أحب الأهلى منذ صغرى وطول عمرى شايف إن حب الأهلى متعه.
أعتبر الأهلى كأحد أفراد أسرتى يجب الإطمئنان عليه يوميّا.
حتى فى الأعياد .... بفرح لما الأهلى بيلعب علشان من غيره مش هينفع أعيّد.
أقاربى جميعا أهلاويه .. لم يفلت منا سوى شقيقى الأصغر "وهو شقيقى الوحيد"
وهو ماجعلنى "رغم حبى الجم للأهلى" لا أكره الزمالك ، أتمنى فوزه طالما بعيد عن الأهلى
وهو أيضا ماجعل بيتنا "بما فيهم أنا" منقسما لنصفين ...
مشجعا للأهلى "لإننا بنكسب على طول"
متعاطفا مع الزمالك "علشان الغلبان أخويا"
... بعد المقدمه الطويله والتى قد يراها البعض ممله ...... إيه لازمة الكلام ده دلوقتى ؟!
الدنيا حلوة .. وبطولة أوروبا حلوة ... يعنى خليك فى حالك ...
سبب كلامى إنى أول مرة أكتب على فيلجول بقالى حولى سنتين
كتبت حاجه بسيطه عنوانها
" ولــــــــــــــى مــــــــــــلاحــــــــظـة : إننا نسبقهم ب (1000) سنه ضوئيه .......... !!!"
وفى طيات الكلام رمانى حظى العسرإلى الحديث عن ما أغضبنى فى مباراة مصر والكونغو "والتى حضرتها فى الإستاد" من هجوم بعض الجماهير على حارس المنتخب عصام الحضرى أقول"حارس المنتخب" وليس حارس نادى كذا أو فريق كذا ...
وهو ماكان فى شكل شتيمته طول الماتش وتشجيع الكونغو بعد الجول الأول ليها علشان الجون دخل فيه وظهور أعلام الأهلى مع الجمهور اللى بيشتم ... غريـــــــــبه
شئ خلانى أتخيل لو أى حد فى المدرج اللى أنا فيه شتم الأهلى ساعتها رد فعلى ممكن يبقى إيه
وعذرت أى حد ممكن يعمل كده فعلا ... عنده حق
أنا مش هقول إذا كان الحضرى يستاهل ولا لا ... لإن ده مش موضوعنا
بس الأكيد إنه لكل مقام مقال
وده ماتش للمنتخب
.
.
.
بالعوده لموضعى
بالفعل كان حظى عسرإنى إتكلمت فى الموضوع ده ... لإن فيه ناس إفتكرتنى باتريق على جماهير الأهلى وهاتك ياضرب فى أخوكم الغلبان ...
ياجماعه هم دول كانوا جماهير الأهلى؟ ... لا طبعا
مانا أهلاوى ... وكنت بشجع المنتخب وبشجعه لإنه فى المنتخب
ياجماعه أنا ماليش دعوه
طب يهديك يرضيك
مفيش فايده
طول عمرى بسمع عن ديكتاتورية الجماهيرالحمراء "على رأى وليد الحسينى" ومابفكرش فيها .. وحتى لو فكرت ببقى مبسوط ... مش فرقتى
لغاية ماطالتنى
بقيت فى خانة "الليك"
بدافع عن موقف أنا شايف نفسى فيه على حق ودفاعى مش بينتهى بالمنطق ... لأ
ده لازم ينتهى بحلفان بأغلظ الأيمان إنى أهلاوى ... والله العظيم أهلاوى
تجنبا لسهام من جمهور فرقتى "نيران صديقه" تتهمنى فيه بالموالاه لحارس مرمى فريق سيون "سيفون" كما يحلو للبعض تسميته
أو إنتمائى لجمهور فريق منافس
ياجماعه أنا أهلاوى والله العظيم أهلاوى
أهلااااااااااااااااااوى
كلامى مش قاصد بيه جماهر الأهلى
كلامى قاصد بيه حالنا عموما
باعتبار إنى أهلاوى
لازم لما أتكلم مع حد أعرف هو أهلاوى ولا لا
إذا كان أهلاوى أكلمه واخد وأدى معاه وقبل كلامه وتريقته وإذا لا .... يبقى ياويله ياسواد ليله ...
وده بيحصل أكيد مع جمهور مصر كله
قبل مايتكلم معاك لازم يعرف لونك الأول
لو لونك مش نفس لونه يبقى إنت أكيد مابتفهمش "ومالكش فيها"
مشكلتنا فى لغة الحوار
ماعندناش ثقافة الإختلاف
لو إختلفنا لازم نقوم شاتمين بعض
موضوع: الي كل اهلاوي 
الأحد يوليو 13, 2008 10:54 am
